07. ආනෛකොඩ්ඩායි ලෝහ මුද්‍රාව

මේ සම්බන්ධව හොයාබලපු හැම කෙනෙක්ම පොදුවේ පිළිගන්නවා මෙහි පැරණිම බ්‍රාහ්මි අකුරු කියවිය යුත්තේ අපි සාමාන්‍යයෙන් කරන ආකාරයට වමේ සිට දකුණට නොව දකුණේ සිට වමට කියලා.
මහාචාර්ය ඉන්ද්‍රපාල මැතිතුමා මෙයින් යට තියෙන පැරණිම බ්‍රාහ්මි අකුරු “කොවෙන්ත” නැත්නම් “කොවෙතං” කියලයි කියවන්නේ. ද්‍රාවිඩ පවුලේ භාෂා අනුව මෙයින් අදහස් වෙන්නේ “රජුන්ගේත් රජු” නැත්නම් “රජු යන්න දෙවරක් යෙදී ඇති බවයි” ඔවුන්ගේ පැහැදිලි කිරීම. ඒ වගේම ඉහළ පේළියේ තියෙන ත්‍රිශූල වගේ සංකේතයෙන් රජු යන්නත් එය දෙ වරක් යෙදීම මගින් රජුන්ගේ රජු යන්න එයින් ද ගම්‍ය වන බවත් කියල තියෙනවා. මේ විද්වතුන් මේ මුද්‍රාව සඳහා ලබාදුන් අර්ථකථනය ඔස්සේ යාපනය ප්‍රදේශයේ පාරම්පරික දෙමළ නිජභූමියක් පැවති බවට සාධකයක් විදිහටත් යොදා ගත්තා. මේ එල්ටිටිඊ ත්‍රස්තවාදයත් යහමින් පැවති කාලයක්.

මේ ගැන බොහෝ අය නිශ්ශබ්ධව සිටියත් කොළඹ, පුරාවිද්‍යා පශ්චාත් උපාධි ආයතනයේ ජේ්‍යෂ්ඨ මහාචාර්ය රාජ් සෝමදේව මැතිතුමා විසින් කැලණිය විශ්වවිද්‍යාලය මඟින් 1998 දී ප්‍රකාශයට පත් කළ ‘සරසවි’ කියන ලිපි එකතුව සඳහා සපයන ලද ‘ආනෛකොඩ්ඩායි ලෝහ මුද්‍රාව : ස්වරාජ්‍යවාදි ප්‍රවේෂයෙන් ඔබ්බට’ කියල ලිපියෙන් නිභයව, වඩාත් හොඳ පැහැදිලි කිරීමක් කරල තියෙනවා මේ ගැන. මේ සම්බන්ධයෙන් ශාස්ත්‍රකාමි හැම කෙනෙක්ගෙම ගෞරවය එතුමාට හිමි වෙන්න ඕන. ඒ වගේම මේ කරුණු අපි කවුරු කවුරුත් දැනගන්නත් ඕන. එතුමා මේ ලිපියේ තියෙන දෙමළ නිජබිම්වාදි ඉතිහාස පක්ෂපාතිබව පිළිබඳ සාකච්ඡා කර ඉන් අනතුරුව මෙම ලේඛනය පැවති සන්දර්භය පිළිබඳවත් අවධානය යොමු කරමින් මෙම මුද්‍රාවේ පහළ පේළියේ ඇති අකුරු මගින් “කෙවෙත” යන්න සටහන් කර ඇති බව පෙන්වා දුන්නා. සිංහල ප්‍රාකෘතයෙන් සටහන් කර ඇති මේ කෙවෙත යන්නෙන් කෙවුල්, කෙවට්ට යන අදහස ජනනනය වන බව එතුමා පැහැදිලි කරයි. ධීවර කර්මාන්තය හා සම්බන්ධ මුදුහුබඩ ස්ථානයකින් මේ සොහොන හමු වීම නිසා යම් ධීවර ජනකායකගේ ප්‍රධානියෙක් සම්බන්ධ සොහොන් ගර්භයක් බව ද පෙන්වා දී ඇත.

ඉතිං මේ, අපි නොදන්නවා වුනාට ලංකාවේ බෙහෙවින් විවාදයට හේතු වූ හා ඉදිරියේදීත් හේතුසාධක විය හැති පුරාකෘතියක්. මේ නිර්මාණය දැන් කොහෙද තියෙන්නේ කියල මේ ලියුම්කරු මීට පෙර සොයා ඇතත් ඒ ගැන හරිහමන් විස්තරයක් නම් දැනගන්න ලැබිල නැහැ. ලැබුණු සැකකටයුතු තොරතුරු අනුව නම්, පොන්නම්බලම් රඝුපති මැතිතුමාගේ සිරිමතිය සමඟ මෙය ඇති බව අහන්න ලැබුනා. හැබැයි ඒ ලංකාවේ නෙවෙයි ඉන්දියාවේ.

මේ ගැන වැඩිදුර හොයාබලන්න කැමැත්තක් ඇති කෙනෙකුට මේ ලිපිය තුළ දක්වා ඇති ලිපි හා පොත් හෝයාගෙන කියවන්න පුළුවන්. ඒ වගේම පේරාදෙණිය විශ්වවිද්‍යාලයේ ජේ්‍යෂ්ඨ කථිකාචාර්ය Sumedha Weerawardhana මැතිතුමා බොහොම මහන්සි වෙලා විස්තර හොයාගෙන මේ පිළිබඳ www.archaeology.lk/sinhala වෙබ් අඩවියට මේ ගැන ලිපියක් සපයලා තියෙනවා. ඒ ලිපියත් කියෙව්වොත් හොඳ දැනුමක් ගන්න පුළුවන්. (මේ ලිපිය එක්ක අමුණා ඇති ඡායාරූප 4 ගත්තෙත් සුමේධ වීරවර්ධන මහතාගෙන්මයි. වම් පැත්තේ තියෙන්නේ මුද්‍රාවේ සඳහන් අක්ෂර හා සංකේත. දකුණු පැත්තේ ඉහළ තියෙන්නේ මුද්‍රාව හා දකුණු පැත්තේ පහළ තියෙන්නේ මුද්‍රාව හමු වූ මානව සැකිල්ල.)